Ардын Тэтгэврийн Данс ХХК-ийн эрхэм харилцагчид, бизнесийн түнш, хамтран ажиллагсад та бүхний энэ өдрийн амар амгаланг эрэн мэндчилье.
“Ирээдүйгээ өмчил” уриан доор “Ардын Тэтгэврийн Данс” ХХК нь 2007 оноос эхлэн харилцагч иргэд болон байгууллагын ажиллагсдад тэтгэврийн хуримтлал үүсгэж, харилцагчдынхаа хуримтлалыг хөрөнгө оруулалт хийх замаар эдийн засгийн эргэлтэд оруулж, харилцагчдадаа өндөр өгөөж хүртээж ажилласаар ирсэн билээ.
2020 оны босго дээр ахмад настнуудын тэтгэврийн зээлийг Засгийн газрын шийдвэрийн дагуу тэглэсэн явдал нь тэтгэврийн тогтолцоог цаг алдалгүй шинэчлэх шаардлагатайг харуулсан билээ. Та бүхний мэдэж байгаачлан тэтгэврийн шинэчлэлийн ажлын хэсэг Улсын Их Хурлын дэргэд өнгөрсөн оны 1 сард байгуулагдаж ажиллаж эхэлсэн бөгөөд Хувийн тэтгэврийн тухай хуулийн төсөл 5 дугаар сард Улсын Их Хуралд өргөн баригдаж, 10 дугаар сард хуулийн төслийг анхны хэлэлцүүлэгт шилжүүлсэн билээ. Хуулийн төсөл батлагдсанаар Монгол улсын нийт иргэдийн эрх ашигт нийцсэн, ирээдүйг нь баталгаажуулсан, урт удаан, эрүүл энх, жаргалтай амьдрах итгэлийг өгсөн, Монгол хүн эх нутгийнхаа баялагт эзэн суух үүд хаалгыг нээх түүхэн өөрчлөлт авчирна гэдэгт бид итгэлтэй байна.
2020 ондоо харилцагчдын тоог 763 хувиар өсгөж 10,000-ын босгыг давсан явдал нь бидний хамгийн том амжилтын нэг байсан бөгөөд тухайн жилд олсон хөрөнгө оруулалтын ашиг өмнө жилээс 63 хувиар өсч 1.6 тэрбум төгрөгийн хөрөнгө оруулалтын ашигтай ажиллалаа. Тэтгэврийн тогтолцоог шинэчлэхийн ач холбогдол, тэтгэврийн хуримтлалын талаар байгууллага хамт олон ба иргэдэд цар тахлын үед цахимаар мэдлэг боловсрол олгож байсан ба цаашдаа иргэдээ мэдлэг, мэдээллээр тогтмол хангах төлөвлөгөөтэй ажиллаж байна.
Хувийн тэтгэврийн сангийн хууль, эрх зүйн орчныг бүрдүүлж, тэтгэврийн тогтолцооны шинэчлэлийг цаг алдалгүй хийснээр Монгол улсын нийгэм, эдийн засгийн хөгжилд, ялангуяа хөрөнгө санхүүгийн зах зээлд үсрэнгүй өөрчлөлт авчрах, түүнийг дагаад төрийн бодлогоор нэн чухалд тооцогдох уул уурхай, хөдөө аж ахуй, боловсролын салбарт богино хугацаанд эерэг нөлөө авчрах боломж бүрдэнэ гэдэгтэй та санал нийлэх биз ээ. Мөн иргэдийн урт хугацаат тэтгэврийн хуримтлалыг үүсгэх боломжийг нээх нь дээр дурдсан эерэг үндсэн үр дүнгээс гадна нэгт, үйл ажиллагаа явуулж буй хувийн тэтгэврийн сангуудын зохицуулалт, хяналтыг бий болгох, хоёрт, хөрөнгийн болон санхүүгийн зах зээлд мэргэжлийн оролцогч бий болгох чухал ач холбогдолтой юм.
Ардын Тэтгэврийн Данс компани үүсгэн байгуулагдсанаас хойш тэтгэврийн хуримтлал үүсгэсэн, хамтран хөрөнгө оруулалт хийсэн, бидэнд итгэл хүлээлгэн "Ирээдүйгээ өмчил" уриан дор нэгдсэн нийт иргэд, аж ахуйн нэгж, албан байгууллага болон хөрөнгө оруулагч нартаа гүнээ талархан мэхийн ёсолъё.
Хүндэтгэсэн,
Гүйцэтгэх захирал Б.Гантулга
